ailean@obantimes.co.uk
THA MI A’ SGRÌOBHADH seo is am Mòd Nàiseanta Rìoghail air fosgladh le othail ciùil agus òran, mar bu dual, ann an Steòrnabhagh.
An dèidh aimsir beagan caochlaideach aig toiseach gnothaich tha cùisean a’ togail orra agus tha sinn a’ guidhe aig a’ char as lugha gum faigh a’ chloinn sìde mhath airson an cuid fhèin den Mhòd. ‘S e pàirt chudromach den dìleab a th’ aig gach Mòd, Ionadail agus Nàiseanta, gum bi cuimhne mhath aig an òigridh air an tachartas agus gum bi iad air am brosnachadh leantainn leis a’ chànan agus cumail ga foillseachadh is ga cleachdadh aig Mòdan agus nam beatha làitheil feadh na dùthcha. Gun teagamh ‘s e fàs ann an cleachdadh na Gàidhlig agus ann an àireamh luchd-ionnsachaidh agus fhileantaich am prìomh amas a dh’fheumas a bhith aig Plana Nàiseanta na Gàidhlig, agus ‘s e prìomh dhùbhlan dha Bòrd na Gàidhlig na h-iomairtean leasachaidh as èifeachdaiche a dh’ionnsaigh a chinn-uidhe sin aithneachadh agus a neartachadh.